شاعرہ: عقیلہ نوال
درداں نوں نہ پھرول وے بیبا
کجھ دیر کجھ نہ بول وے بیبا
میرا لوں لوں زخمی ہو گیا
مینوں اینج نہ رول وے بیبا
کون سنے گا ہن باتاں میریاں
دل وچ اٹھڈے ہول وے بیبا
میں کس نوں اپنا مجرم اکھاں
میں آپ نہ پایا مول وے بیبا
مینوں لوکاں لیراں کیتا اے
ہور نہ تنداں کھول وے بیبا
مینوں ہن ہجر پکاردا نئیں
میرے مک گئے بول وے بیبا
میں وکھرے ڈیرا لا لیا اے
کوئی نئیں میرے کول وے بیبا
میری روح وی چھلنی ہوگئی
مینوں ہور نہ ٹٹول وے بیبا
میرے مک گئے بول وے بیبا
کجھ دیر کجھ نہ بول وے بیبا
No comments:
Post a Comment